L’età de i metai preziosi

Racconto Da Gianna Longo (Adattamento a cura di Luigi Bologna)

On buteleto, co so nono, sentà sul meàle de casa, i se gode el primo sole tiepido de marzo. El buteleto ‘l ghe domanda a so nono: “Nono, ma ti… che età gh’èto?” “Eh” , ghe fa so nono, “caro mio, se te savessi! Mi a gò ‘n’ età che l’è quéla de i metài preziosi!” “Oh!”, 'l fa el buteleto spalancando i oci ,“... come sarìa?” “Desso te spiego mi, caro neodeto, védito, mi gò … de piombo le gambe … “Nono, ma ‘l piombo no ‘l me pare mìa on metalo prezioso!” “ Par quelo, a te gh’è reson: a fao ‘na fadiga a strapegàrle avanti … però de argento a gò i cavei , i denti de oro, se el dentista no ‘l m’ha imbrojà.” El buteleto, incantà, el ghe domanda ‘ncora: “Nono, dime … coss’elo che se fa in te 'sta età preziosa?” ”Eh, ghe dise so nono, se pol fare tute che le robe che no se gà vu tempo da far prima. A mi, presempio, me intaressa la storia, son... on studioso de storia!” “ Dal bon nono, ti te studi la storia, come mi a scola?”, ghe fa el buteleto sempre piassè intaressà. “Eh, caro mio, mi so dirte tuto quélo che gh’è capità da quando che son nato, fin desso! Te sé quando che te me vedi che son là su la carega co i oci sarà che pare che dorma?! E inveze no! … mi son là che penso! … che me ripasso i nomi e i visi de e persone che gò conossù, e de chi i gèra fioi, e che laoro faséa so apà, e ‘ndove che i staséa … eh … go tanto mi da ricordare, da ripassare... e te voi dire anca ‘n’antra roba, caro neodéto, me son specializà in te ‘na materia che la va tanto de moda desso, la meteorologia! Mi so sempre che tempo farà ancò e che ‘l farà domàn parché varda, se me fa male le gambe, l’è piova sicura … se me fa male ‘l colo vol dire che riva aria freda de tramontana … se go mal de testa, vol dire che ‘l tempo se buta a siroco … e se me vien mal de schiena, el tempo l’è in movimento e ‘l ga oja de cambiare!”. “Ma che belo, nono! Dài, cònteme 'ncora!” ‘l dise ‘l buteleto. “Ah, ma no l'è mìa finìa! Te ghè da savére, caro neodéto, che mi, me dedico a la 'ricerca', se dise cossì, no, desso? Difati, son sempre là che zérco, e zérca … e indove gavarò messo i ociài, e indove gavarò postà ‘l capèlo … che a mi, me pare impossibile, basta che me serva ‘na roba e te pol star sicuro che no la cato altro! E vardo … de qua … de là …de su, ... de zò, insoma, a fao 'l ricercatore”. El buteleto l’è tuto entusiasto, el ghe fa a so nono: “Oh nono! Quante robe che te fè, e che te sé ti! Che bèla che l’è la to età, vorìa tanto vérghela anca mi 'sta età preziosa!” ...Sta tranquilo bèlo, sta tranquilo, che la riva sì, anca par ti! Ma no sta a vérghe pressia desso, che on dì tacà a che l’altro, la fa presto a rivàre! … parché i ani, quando i è invià, no i e fèrma pì gnessuni, e i core sempre più svelti e i se mucia uno sora che l’altro e ti no te te ne incorzi gnanca de che mucio che te gh’è fato! Però seto cossa che gò da dirte, caro neodéto, che te ghè reson ti! … a l’è proprio ‘na bèla età questa … l’età de ci che gà visto tante robe, e che gà la boca che gà saludà e parlà con tanta gente, e le man che gà laorà e carezzà tanto … e che gà ‘l core che l’è pien de tuto ‘l ben che se gà dà e che se gà vù! Sì, … a l’è proprio ‘na bela età (la tua!).